So, Deon Stegmann, die man sonder die Bulls nie die sukses van 2009 en 2010 sou kon behaal nie, is nou skielik oor sy beste. Hy het te klein geword en is nie meer relevant weens die veranderende tendense van rugby nie. Dis die argument, korrek?
Kom ons krap ‘n bietjie rond in die statistiek.
Michael Hooper van Australië het die internasionale arena verlede jaar soos ‘n warrelwind getref. Hy was ‘n doring in die Bokke se vlees met die toets in Perth in September, toe Heyneke verkies het om sonder ‘n fetcher in sy beginspan te speel. Die Waratahs het groot geld betaal om hom by die Brumbies af te rokkel. En raai net, die knaap is 1,82 meter lank en hy weeg maar 97kg! Dus een sentimeter langer as Steggies, maar 3kg ligter.
Die Reds se Liam Gill is 1,84 meter lank en weeg 96kg. Hy is verlede jaar op 20 reeds deur die Wallabies nadergetrek en is al deur die Aussie-media “die beste balsteler in die spel naas David Pocock” genoem.
Pocock self het geen bekendstelling nodig nie. Behalwe miskien om te noem dat hy ook net 1,84 meter lank is en 100kg weeg.
Die Braid-broers van die Blues is welbekend vir die skade wat hulle kan doen aan enige span, veral as hulle saam as kombinasie speel. Gaan kyk maar weer na daardie skok-nederlaag wat ons verlede jaar hier op Loftus teen hulle gelei het. Stegmann het daardie dag met ‘n besering opgedraf en moes later die veld verlaat, waarna die Braid-broers gemaak het wat hulle wou, want CJ Stander is nie ‘n fetcher nie en Jacques Potgieter duik eerder bo-oor die losskrum as om daar in te duik en die bal te gaan uithaal. In elk geval, Daniel Braid is 1,83 meter lank en weeg 100kg, terwyl kleinboet Luke 1,85 meter lank is en 101kg weeg.
Tanerau Latimer van die Chiefs, wat so lekker saamspeel met Liam Messam dat hy in verlede jaar se Superrugby finaal bo die All Black Sam Cane gekies is, is 1,83 meter lank en weeg 101kg. In die finaal het hy Keegan Daniel totaal geëlimineer.
Matt Todd, die man wat deur Richie McCaw en Tod Blackadder met die hand uitgesoek is om McCaw se plek vol te staan by die Crusaders in sy afwesigheid, is 1,85meter lank en hy weeg 103kg.
John Hardie was een van die Highlanders se sterre in die eerste deel van verlede jaar se Superrugby reeks, voordat hy beseer is. Hy is 1,83meter lank en weeg 97kg.
Les bes, Deon Fourie, wat verlede jaar die beste fetcher in die Curriebeker was en ’n reuse aandeel in die WP se veldtog gehad het, is maar 1,78meter lank en weeg 102kg! Sy spanmaat, Siya Kolisi, wat skielik deur almal as die “next best thing” in rugby beskou word is 1,87meter lank en weeg 101kg.
Deon Stegmann is 1,81meter lank en weeg 101 kg. Dit is 6cm korter as die langste man wat hierbo genoem is (Kolisi) en, terwyl heelwat van hulle ligter as hy is, is nie een van hulle meer as 2kg swaarder nie. Nou vra ek aan al die kenners: Watter verskil maak 6cm sonder ten minste 10kg daarmee saam? Hoekom sal Kolisi, wat presies dieselfde weeg as Stegmann, nou skielik ‘n beter baldraer as hy wees? Wie het hierdie belaglike argument uitgedink van “groter baldraers” is beter as klein baljagters? Waarom kan Stegmann nie ook ‘n baldraer wees nie? Hy is maar 3kg ligter as Arno Botha, wat aangeprys word as die beste ding sedert gesnyde brood as dit kom by die dra van die bal!!
Wie was die Cheetahs se beste baldraer in die Curriebeker verlede jaar? Ek wil my verstout om te sê Kabamba Floors het baie naby aan dié titel gekom,want hulle het hom gereeld gebruik om oor die voordeellyn te dryf. Dis nou Kabamba die bottelblonde flankie/agtsteman van 1,75m en 89kg!
I rest my case, djou hoender!
Dames en Here, Appels en Pere, hou op om julle slim te hou met praatjies wat hulle langs die braaivleisvure of in die kantoor rondom die teepotte hoor en begin om vir julleself te dink!
Posted by Houtoog on 04 February 2013 18:47